Алматыда бұрынғы күйеуі бензин құйып өртеген әйелдің арызы бойынша істе алдын ала сот басталды. Бұл жөнінде адвокат Айнара Айдархан Азаттыққа хабарлады.

Сот басталмай тұрып өткен баспасөз жиынында жәбірленуші Индира Тергеубаева мен адвокаттары құқық қорғау органдарының әрекетсіздігі салдарынан бір адам өліп (жәбірленушінің бензин құйып, өртеген бұрынғы күйеуі өрт кезінде қаза болған), бір адам мүгедек болып қалғанын айтып, "істе бір ғана адам күдікті танылған, біз мұнымен келіспейміз, кемінде төрт адам жауапқа тартылуы керек" деп мәлімдеді. Олар "сот кінәлілерді жазалауы тиіс, сот әділ өтеді" деп үміттенеміз деді. Олардың сөзінше, өрттен кейін бес операцияны бастан кешірген Индира Тергеубаева прокуратураның табалдырығын тоздырып жүріп, 20 айдан кейін әрең "жәбірленуші" статусына ие болған. Іс төрт рет жабылып, жәбірленуші жақ президент пен ішкі істер министрінің қабылдауына жеткен кезде ғана жылжи бастаған.

Адвокат Айнара Айдарханның Азаттыққа айтуынша, 21 қарашада өткен алдын ала сот тыңдауы кезінде жәбірленуші тарап істі Алмалы емес, Жетісу аудандық сотында қарауды өтінген. Сот өтінішті мақұлдаған.

"Қаза болған адам Жетісу ауданында тұрғандықтан және полицейлердің немқұрайлығы да осы жерде болғандықтан соттылық бұзылды деп санайтынымызды жеткіздік. Сот келісіп, істі Жетісу аудандық сотына берді. Біз өзге де өтініштер түсірдік. Егер ешкім шағым түсірмесе, 15 күннен кейін іс басқа сотта қаралады" деді адвокат Айнара Айдархан.

Алматыда бұрынғы күйеуі бензин құйып өртеген, соның салдарынан мүгедек болып қалған Индира Тергеубаеваның бастан кешіргені бұған дейін ақпарат құралдарында жазылған. Бір күн бұрын ол The Qazaq Times басылымына берген сұхбатында бұрынғы күйеуінен көрген құқай мен өрттен кейінгі көрген азабын айтып, тауыса алмаған еді.

Айтуынша, бұрынғы күйеуі оны аңдып, мазасын ала бергеннен кейін көші-қон полициясына шағымданған. Полиция сот арқылы оны елден депортациялап, бес жыл бойы Қазақстанға кіруіне тыйым салу туралы шешім шығарған. Алайда сот шешімі орындалмаған. Құзырлы органдар шешімді орындауға да күш салмаған дейді Тергеубаева.

Ақыры Тергеубаева ашқан дүкенге бұрынғы күйеуі 2022 жылы желтоқсанда барып, "бәрібір менімен бірге боласың, мына дүниеде болмасаң да, ана дүниеде бірге боламыз" деп дүкенге от қойған. Күйеуінің өзіне бензин шашып өртегенін сұхбатта ол былайша баяндайды.

"Бірінші шашқан бензин оң көзіме құйылып кетті. Көзім ашып, оң көзімді аша алмадым. Сол арада "мен сені өлтіруге келдім, бүгін екеуіміз өлеміз, бұл дүниеде менімен бірге болғың келмесе, о дүниеде менімен бірге боласың"деп мені өлтірмекші болды. Жүгіріп барып терезені қағуға ғана шамам жетті....Ол мені дүкеннің ішінде қуалап жүріп, үстіме бензин құйып жүрді. Сонан кейін сөмкесін ашып, бір нәрсені ала бастады. Жанына барып қарасам, кесілген мылтығы бар екен. Сол мылтықты алмақшы болып еді, құдай оңдап замок ашылмай қалды. Сол кезде бар күшіммен оны итеріп жібердім. Ол жығылып барып "жарайды, олай болмаса былай өлесің деп қолындағы автомататты оттықты (горелкасын) қосты. Сол кезде жарылыс болды..." дейді Индира Тергеубаева сұхбатта.

Оның сөзінше, бірнеше рет жарылыс болған. Жарылыстың қуатынан ол бірнеше метр жерге ұшып кеткен.

"Құдықтың түбіне екі қолыммен, тіземмен құладым. Шаштарым өртеніп, жерге түсіп жатыр. Екі қолым әппақ болып кеткен. Терім сыпырылып, қаным араласып түсіп жатыр. Қарасам, жан жақта полиция қызметкерлері жүр, бірақ маған жолаған жоқ. Тек біреуі ғана келіп, екі қолы қалтасында, "іште тағы кім бар?" деп сұрады. Бұрынғы күйеуімнен басқа ешкім жоқ дедім. Ол бұрылды да кетіп қалды" дейді Индира Тергеубаева.

Осы өрттің салдарынан ол ауруханада 50 күннен астам жатып, бес операцияны бастан кешірген. Екінші топ мүгедектігін алған.

Жәбірленуші жақтың сөзінше, Тергеубаева '"Немолчи" қорына хабарласып, журналистерге шығып, прокуратураның табалдырығын тоздырып жүріп, 20 ай өткенде ғана жәбірленуші статусына ие болған. Осы уақыт аралығында іс төрт рет жабылған. Президент пен ішкі істер министрінің жеке қабылдауына жазылдық дегенде ғана іс жылжыды дейді олар.

Олардың пікірінше, "құқық қорғау органдарының әрекетсіздігі салдарынан бір адам өліп, бір адам мүгедек болып отыр. Егер депортация туралы шешім орындалғанда жағдай бұлай ушықпас еді" деп санайды. Олар істе бір емес, төрт күдікті болуы керек деп есептейді.

"Бір ғана күдікті бар. Мұнымен толық келіспейміз. Біздің ойымызша, төрт күдікті болуы керек. Екеуі көші-қон қызметінің өкілдері, екеуі - учаскелік полицей. Бірақ неге екені белгісіз, прокуратура полиция департаментімен бірге тек бір адамға қатысты шешім шығарған. Немқұрайлықтың соңы қандай ауыр жағдайға келіп отырғанын олар түсінбейтін сияқты" деді 20 қараша күнгі баспасөз жиынында Айнара Айдархан.

"Біз шындыққа жеткенше тынбаймыз. Шындық шындық болып қалуы керек" деді Индира Тергеубаева жиында.

Алматы қаласының прокуратурасы әзірге бұл іс бойынша түсініктеме берген жоқ

АҚШ пен Қытай өзара саудада бұған дейін жарияланған импорттық баж салығын едәуір арттыруды 90 күнге кейінге қалдыра тұру жөнінде уақытша келісімге келді. Бұл туралы Женевада өткен келіссөз қорытындысы бойынша АҚШ-тың қаржы министрі Скотт Бессент хабарлады.

Баж салығын бірнеше кезеңмен көтеру нәтижесінде АҚШ Қытайдан әкелінетін кейбір тауарларға салған баж салығы 145%-ға дейін, ал Қытай АҚШ тауарларына баж алымын 125% етіп ұлғайтқан еді.

Бессенттің айтуынша, енді тараптар баж салығын кем дегенде 90 күнге 115%-ға төмендете тұруға келіскен. Ақ үй келіссөз нәтижесі бойынша бірлескен мәлімдеме жариялады. Онда бұл келісім осы аптада, 14 мамырдан бастап күшіне енетіні айтылған.

Бұл келісім Қытайдың америкалық тауарларға салатын баж салығы бастапқы 10% деңгейіне түседі, ал АҚШ-тың Қытай тауарларына салатын бажы 30% болады дегенді білдіреді. Алдағы үш ай ішінде тараптар өзара сауда мәселелері бойынша келіссөздерді жалғастырады.

ОҚИ ОТЫРЫҢЫЗ

Трамп Қытайға қарсы баж салығын тағы 50 пайызға көтерем деді, Пекин "соңына дейін күресетінін" айтты

Бұл жаңалық нарыққа оң өзгеріс әкелді: активтер құны өсіп, мұнай мен биткоин да қымбаттады.

АҚШ әкімшілігі Қытай тауарларына баж салығын осы елмен саудадағы теңгерім әділ емес деген сылтаумен көтеруді ұйғарған. Вашингтон Қытай билігін "синтетикалық есірткі фентанил өндіруге қолданылатын химиялық заттар экспортына тосқауыл қоймады" деп кінәлаған. Қытай болса өзі негізсіз деп санайтын айыптауларға бола төменшектемейтінін айтып, өз мүдделерін қорғайтынын мәлімдеген.

ОҚИ ОТЫРЫҢЫЗ

БАҚ: Трампты баж енгізуді тоқтата тұруға қаржы мен сауда министрлері көндірген

Тәуелсіз күрд мемлекетін құру мақсатын көздеп ондаған жыл бойы Түркия үкіметіне қарсы қарулы күрес жүргізген Күрдістан жұмысшы партиясы (КЖП) өзін-өзі таратып, қаруын тастайтынын мәлімдеді. Бұл ақпаратты 12 мамырда ұйымға жақын Firat ақпарат агенттігі хабарлады.

Түркия, АҚШ және Еуропа одағы КЖП-ны террористік ұйым деп таныған.

Қазіргі кезде Түркияда өмір бойына бостандығынан айырылып, түрмеде отырған КЖП басшысы Абдулла Оджалан бұған дейін ұйымды өзін-өзі таратуға үндеп мәлімдеме жасаған болатын. Оджаланның үндеуіне жауап ретінде КЖП Ирактың солтүстігінде, ұйымның негізгі базасы орналасқан жерде жиын өткізіп, бұл шешімді қолдады. Жария болып отырған мәлімдемеде КЖП "тарихи миссиясын орындағанын", енді күрд мәселесі демократиялық жолмен шешілуі мүмкін екенін айтқан.

ОҚИ ОТЫРЫҢЫЗ

Түркиядағы терактіде бес адам мерт болып, 20-дан астамы жараланды

Түркияның билеуші партиясының өкілі Өмер Челик бұл шешімді "террордан азат Түркияға қарай маңызды қадам жасау" деп атады. Хабарларға қарағанда, Анкара КЖП-дан осындай шешім күткен. Ақпарат агенттіктері Түркия президенті Режеп Тайып Ердоған күрдтер тығыз қоныстанған елдің оңтүстік-шығыс аймақтарын дамытуға, егер ол жерлерде қауіпсіздік қамтамасыз етілетін болса, қосымша қаражат бөлуге уәде еткен деп хабарлады.

Кейінгі уақытқа дейін Түркия құқық қорғау органдарының қызметкерлері мен шенеуніктерге қарсы терактілер жасап келген КЖП-мен күресті билік оппозицияны қудалауға да сылтау етіп пайдаланған. Мысалы, жақында ұсталған Стамбұл мэрі Экрем Имамоғлына КЖП-мен байланысы бар деген айып тағылған.

Күрдістан жұмысшы партиясы 1984 жылдан бері Түркия билігіне қарсы қарулы күрес жүргізіп келді. Түркия болса сепаратистермен күрес барысында көрші елдер аумағында да жиі операциялар жүргізіп, кейінгі жылдары Сирияның солтүстігіндегі бірнеше аймақты басып алған.

ОҚИ ОТЫРЫҢЫЗ

Түркия Ирак пен Сириядағы Күрдістан жұмысшы партиясымен байланысты нысандарға шабуыл жасады

Украина президенті Владимир Зеленский жаңа сайланған Рим папасы XIV Леомен телефон арқылы сөйлесіп, оны Украинаға апостол сапарын жасауға шақырды.

"Мұндай сапар дінге сенетін барлық жанға, біздің халқымызға нағыз үміт сыйлар еді. Бұл біздің алғашқы телефон қоңырауымыз, соған қарамастан әңгіме өте мәнді әрі жылы болды" деп жазды Украина президенті телеграм-каналында.

Зеленский Рим папасымен әділ бейбітшілікке қол жеткізу, тұтқындарды босату және украиналық балаларды үйіне қайтару жайлы талқылаған. Бұған қоса, екі тарап жеке кездесу өткізуге де келіскен.

XIV Лео кардинал қызметінде болғанда Украинадағы соғысты "империалистік басқыншылық" деп атаған еді.

Кардинал Роберт Прево биыл 8 мамырда Рим папасы болып сайланып, өзіне XIV Лео деген есімді таңдап алды. Ол Рим-католик шіркеуі басшылығына келген алғашқы америкалық діндар ретінде тарихқа енді.

XIV Леоға дейін, 2013 жылдан бері Рим католик-шіркеуін басқарған папа Франциск 21 сәуір күні 89 жасында өмірден озды. Марқұмды 26 сәуірде, оның өз өсиеті бойынша, Римдегі Санта-Мария-Маджоре базиликасында жерледі.

12 мамырға қараған түні Ресей әскері Украинаға 108 дронмен шабуыл жасаған. Бұл туралы Украина қарулы күштерінің әуе күштері хабарлады. Дрон шабуылы Одесса, Николаев, Житомир және Донецк облыстарына жасалған.

Одесса облысында дрон шабуылы салдарынан бір адам зардап шеккен.
Белгород-Днестровский қаласы да шабуылға ұшырады: тұрғын үйлерге, әкімшілік ғимаратқа және өрт сөндіру бөліміне зақым келген.

Украина темір жолы Донецк облысында жүк пойызына шабуыл жасалып, машинист жараланған деп хабарлады.

Осылайша, Ресей Украина билігі жасаған, Еуропа одағының жетекші елдері мен АҚШ қолдаған, 12 мамырдан бастап 30 күнге атысты толық доғару туралы үндеуді елеусіз қалдырды.

ОҚИ ОТЫРЫҢЫЗ

Трамп Украинаны Ресеймен Түркияда кездесуге үндеді. Зеленский "Путинді күтетінін" айтты

Украина Ресейге екіжақты бейбіт келіссөз бастау үшін әуелі атысты ұзақ мерзімге толық тоқтатайық деп шарт қойған. Ал Ресей президенті Владимир Путин атысты алдын ала тоқтатпай-ақ, 15 мамырда Стамбұлда келіссөз өткізуді ұсынды.

АҚШ президенті Дональд Трамп Украинаны Ресеймен мүмкіндігінше тезірек келіссөз бастауға шақырды. Бұған қоса ол бейбіт келісім жасау мүмкіндігіне күмән келтірді.

Украина президенті Владимир Зеленский Түркияға барып, Путинмен жеке кездесуге дайын екенін мәлімдеді, бірақ Путин ондай ойы барын айтқан емес. Зеленскийдің сөзіне қарағанда, ол атыс тоқтатылмаса да Түркияға бармақ ниетте. Мұны дереккөздерге сүйеніп Axios басылымы да растады.

Бұған дейін Ресей президенті Владимир Путин Ұлы Отан соғысындағы Жеңістің 80 жылдығына орай үш күндік бітім жариялаған болатын. Путин бітім кезінде Ресей барлық әскери іс-қимылды тоқтатады деп мәлімдеген. Алайда украин әскерінің мәліметінше, Путиннің ол сөзі орындалмаған. Соған қарамастан, Украина қарулы күштерінің әуе күштері басшылығының деректері бойынша, үш күн бойы Украина аумағы жаппай дрон шабуылынан тыныш болған. Путин жариялаған үш күндік бітім 11 мамырға қараған түні аяқталды.

ОҚИ ОТЫРЫҢЫЗ

Путин Киевке тіке келіссөзді жалғастыруды ұсынды. Атысты бір айға тоқтату үндеуіне жауап бермеді

12 мамыр күні Астана уақытымен таңертеңгі 6:33-те сейсмологиялық станциялар желісі Алматыдан оңтүстік-батысқа қарай 234 шақырым қашықта, Қырғызстан аумағындағы тауда болған жер сілкінісін тіркеді. Жерасты дүмпуі жер бетінен 10 шақырым тереңде болған, MPV шкаласымен 4,8 магнитудаға жеткен, энергетикалық класы – 10,4.

Хабарламада бірнеше ауылдың тұрғындары жер тербелгенін сезінгені айтылған: Қырғызстанның Жаны-Талап, Ақ-Кыя және Көк-Жар ауылдарында сілкініс күші – 3,5 балл, ал Қыдыралы, Сары-Иймек және Байченчек ауылдарында – 3 балл болған.

Өткен сенбіден бері Қазақстанның оңтүстік өңіріндегі тұрғындар бірнеше рет жерасты дүмпуін сезінді. 10 мамырда сағат 20.35-те Алматы маңында жер сілкінді. Қазақстанның төтенше жағдай министрлігінің сейсмостанция желісінің мәліметінше, эпицентрі Алматының оңтүстік-батысынан 35 шақырым жерде, Қазақстан-Қырғызстан шекарасында болған жерасты дүмпуінің күші Алматыда, Қаскелеңде және Қарғалы ауылында 2 балл болып сезілген. Ешкім зардап шекпеген, инфрақұрылымға зақым келгені туралы хабар түспеген.

11 мамыр күні Астана уақыты бойынша сағат 11:44-те Қазақстанның батысында жер сілкінді. Магнитудасы 4,3 баллға тең жерасты дүмпуі Теңіз мұнай-газ кен орны аумағында (Атыраудан оңтүстік-шығысқа қарай 350 шақырым) тіркелген. Сілкініс ошағы 10 шақырым тереңде орналасқан. Куәгерлердің айтуынша, жерасты дүмпуі шамамен 5 секундқа созылған. Қазақстанның Төтенше жағдайлар министрлігі жер сілкінгенін растады, алайда ол сезілген жоқ және халықтан ешқандай суыт хабар түспеді деп мәлімдеді.

Рим папасы болып жаңадан сайланған XIV Лео жексенбі, 11 мамыр күні Ватикандағы Әулие Петр соборы балконына шығып, "Regina Caeli" — "Көк патшайымы" деп аталатын Құдай анаға арналған дұғаны оқыды.

Жаңа папа ретінде алғашқы діни жоралығысын жасаған кезде XIV Лео әлемдегі ірі державаларды бұдан кейін соғысқа жол бермеуге үндеді. Рим папасы Ресей мен Украина арасында шынайы әрі берік бітімге келу, Газада атысты тоқтату және ондағы барлық израильдік тұтқындарды босату қажеттігін айтты.

Папа Үндістан мен Пәкістан арасында жақында болған қарулы жанжалды тоқтату туралы келісімді құптап, Құдайдан "бейбітшілік тілегенін" мәлімдеді.

ОҚИ ОТЫРЫҢЫЗ

Ватикандағы конклав Рим папасын сайлады

Кардинал Роберт Прево биыл 8 мамырда Рим папасы болып сайланып, өзіне XIV Лео деген есімді таңдап алды. Ол Рим-католик шіркеуі басшылығына келген алғашқы америкалық діндар ретінде тарихқа енді.

Ватиканның баспасөз қызметінің хабарлауынша, понтификтің таққа отыруына арналған салтанатты құлшылық рәсімі 18 мамырда өтпекші, ал көпшілікпен алғашқы жүздесуі 21 мамырға жоспарланған.

XIV Леоға дейін, 2013 жылдан бері Рим католик-шіркеуін басқарған папа Франциск 21 сәуір күні 89 жасында өмірден озды. Марқұмды 26 сәуірде, оның өз өсиеті бойынша, Римдегі Санта-Мария-Маджоре базиликасында жерледі.

ОҚИ ОТЫРЫҢЫЗ

Рим папасы Франциск қайтыс болды

Жексенбі, 11 мамыр күні Оман астанасы Маскат қаласында Иранның ядролық бағдарламасына байланысты АҚШ пен Иран арасындағы келіссөздердің кезекті – төртінші кезеңі өтті.

Сәуір айынан бері жүргізіліп келе жатқан келіссөздер осы уақытқа дейін төрт түрлі жерде өтті. Техникалық тұрғыдан алғанда, олар жанама форматта ұйымдастырылған – өзара дипломатиялық қатынасы жоқ АҚШ пен Иран делегациялары осы мәселеде араағайын болып отырған Оман өкілдері арқылы байланыс жасайды. Алайда, жексенбі күні аты-жөні аталмаған америкалық өкілдің айтуынша, келіссөздердің бір бөлігі тікелей форматта өткен.

Иранның сыртқы істер министрі Аббас Аракчи келіссөздер аяқталған соң бұл кезеңді алдыңғы кездесулерге қарағанда "аса маңызды" және "анағұрлым егжей-тегжейлі" деп сипаттады. Ол келіссөздер алға жылжып жатқанын және жалғасатынын айтты, бірақ келесі кезең нақты қай күні өтетіні әлі белгіленбеген. АҚШ та бұл кезеңге "үміт тудырады" деген баға берді.

Келіссөздерге қатысқандардың мәлімдемелеріне қарағанда, келісімге қол жеткізуге негізгі кедергі болып отырған мәселе – уран байыту ісі. Жексенбі күні Аракчи Иран байыту деңгейін төмендете алады, бірақ оны толықтай тоқтатпайды деп мәлімдеді. Бұл орайда АҚШ-тың арнайы өкілі Стивен Уиткофф бұған дейін Вашингтон үшін Иранның уран байытудан толық бас тартуы – "қызыл сызық", яғни принципті ұстаным деп мәлімдеген болатын.

Оман елінің сыртқы істер министрі Бадр Әлбусаиди келісімге қол жеткізу жолында екі тарап та "пайдалы әрі тың" идеялар ұсынғанын мәлімдеді.

Президент Дональд Трамптың айтуынша, АҚШ-тың мақсаты – Иранның ядролық қаруға ие болуына жол бермеу. Вашингтон Ираннан ядролық бағдарламасын тоқтатуды талап етеді. Ал ресми Тегеран бұл бағдарлама ядролық қару жасауды көздемейді деп мәлімдеген. Трамп Иран басшылығына "мәмілеге" келуді ұсынған, бірақ оның егжей-тегжейі жария етілген жоқ. Алайда Тегеранның айтуынша, Иранға салынған санкцияларды жою – кез келген келісімде міндетті түрде көрсетілуі шарт. АҚШ президенті егер келісімге қол жетпесе, онда Иранға күш қолдану шараларын қолдануды жоққа шығармайтынын меңзеді.

Палестиналық ХАМАС радикалды тобы (АҚШ пен Еуроодақ оны террористік ұйым деп таныған) АҚШ пен Израиль азаматы Идан Александерді босататынын мәлімдеді. ХАМАС тобы 2023 жылғы 7 қазанда Израильге шабуыл жасаған кезде Александерді тұтқындап, Газа секторына алып кеткелі бері кепілде ұстап отыр.

Идан Александер – Израиль армиясының әскери қызметкері. ХАМАС оны Израильмен атысты тоқтату жайлы келісімге қол жеткізу және Газаға гуманитарлық көмек кіруін қамтамасыз ету жолындағы күш-жігер аясында босататынын мәлімдеген. Оған қоса бұл процеске Қатар, Түркия және Египет елдері арағайындық жасағанын айтқан. ХАМАС кепілге алынғандардың бәрін босату туралы келісім жасауға дайын екенін білдірді (мәлімдемеде бұл "тұтқын алмасу" деп аталған, себебі Израиль қарымта ретінде палестиналық тұтқындарды босатады).

Александердің нақты қашан босатылатыны әзірге белгісіз. АҚШ-тың арнайы өкілі Адам Бойлер бұл шешімді алға қадам деп атап, ХАМАС-ты қаза тапқан болуы мүмкін деп айтылып жүрген төрт америкалық азаматты да қайтаруға үндеген. Александер – ХАМАС кепіл ретінде ұстап отырғандар арасында тірі қалған соңғы америкалық азамат болуы мүмкін. Кейінгі деректерге қарағанда, 2023 жылы қазанда ХАМАС тұтқындап әкетіп, сол күйі қайтармай отырған 59 адамның кемінде 22-сі әлі тірі.

10 мамырда ХАМАС 2023 жылғы 7 қазанда Израильге жасаған шабуыл кезінде тұтқындап, кепіл ретінде Газа секторына әкеткен адамдар жайлы жаңа видео жариялады. Видеоның соңындағы титрде кепілге алынғандардың өмірін атысты тоқтату туралы келісім ғана сақтап қалады деп жазылған. Видео қашан және қандай жағдайда түсірілгені белгісіз.

Келесі аптада АҚШ президенті Дональд Трамп Таяу Шығысқа сапарын бастамақ. Ол Парсы шығанағындағы елдерге барғалы отыр, алайда Израильге бармайды. Жақында израильдік Maariv басылымы Ақ үй Газа секторында ауқымды әскери операцияның Трамптың сапары қарсаңында басталғанын қаламайтынын жазған. Ақпарат көзіне сүйенсек, АҚШ әскери іс-қимыдарға кедергі келтірмейді, бірақ оларға қолдау да танытпайды.

Осы мәселеде араағайын болған елдер атысты ең болмағанда уақытша болсын тоқтату және кепілге алынғандарды босату жөніндегі келісімге қол жеткізуге талпынып жатыр.

АҚШ президенті Дональд Трамп Украинаны Ресеймен 15 мамыр күні Стамбұлда келіссөз өткізуге"дереу" келісуге шақырды.

"Ресей президенті Владимир Путин Украинамен атысты доғару туралы келісімге қол қоюға ұмтылып отырған жоқ – оның орнына бейсенбі күні Түркияда осы қанды қасапты тоқтатуға қатысты келіссөз өткізуді ұсынды. Украина ол кездесуге дереу келіскені жөн", – деп жазды Трамп Truth Social әлеуметтік желісінде.

Трамптың жазбасынан Украина ұсынған және Еуропа одағының жетекші елдері қолдаған басты шарт – әуелі майдан шебінде 30 күнге атысты тоқтатуды талап етіп отырмағаны аңғарылады.

"Кем дегенде, қандай да бір мәмілеге келу мүмкін бе, соны айқындауға болады. Ал егер мүмкін болмаса – Еуропа елдерінің басшылары мен АҚШ жағдайды толық түсініп, тиісті әрекет жасай алады", – деді Трамп.

Бұған қоса ол "Украинаның Путинмен келіссөз жүргізе алатынына күмәндана бастағанын" айтқан. Оның сөзінше, Путин "Екінші дүниежүзілік соғыстағы Жеңіс мерекесін тойлаумен аса әбігер болып отыр".

"Айтпақшы АҚШ қатыспағанда бұл соғыс ешқашан жеңіспен аяқталмас еді (тіпті маңайламайды да!)" деп жазған Трамп.

Украина президенті Владимир Зеленский Трамптың жазбасынан кейін Telegram-парағына Украина "дипломатия үшін қажетті жағдай жасау" үшін ертеңнен бастап "атыс толық әрі ұзақ мерзімге тоқтайды" деп күтетінін айтты.

Бұған қоса ол Түркияда Ресей президенті Владимир Путинмен бетпе-бет жеке келіссөз өткізуге дайын екенін мәлімдеді.

"Бейсенбіде Путинді жеке кездесу үшін Түркияда күтемін. Бұл жолы ресейліктер келмеуге сылтау іздемес деп үміттенемін", – деді Зеленский. Ол Трамптың мәлімдемесіне байланысты тікелей түсініктеме берген жоқ.

Кейінірек Зеленский бейнеүндеу жариялап, бейсенбіде Түркияда болатынын және сол жерде Путинмен жүздесем деп үміттенетінін растады. Зеленский Түркияда нақты қай жерде болатынын айтқан жоқ – ал Путин өз ұсынысында нақты Стамбұлда деп айтқан. Зеленскийдің сөзіне қарағанда, Ресей атысты тоқтатпаса да ол Түркияға баруға ниетті сияқты.

ОҚИ ОТЫРЫҢЫЗ

Путин Киевке тіке келіссөзді жалғастыруды ұсынды. Атысты бір айға тоқтату үндеуіне жауап бермеді

Украинаға Стамбұлда келіссөз өткізуге ұсыныс жасаған Ресей президенті Владимир Путин оған өзі қатысатыны жөнінде ештеңе айтпаған.

Ресей мен Еуроодақ өкілдері Трамп пен Зеленскийдің кейінгі мәлімдемелеріне байланысты әзірге реакция білдірген жоқ.

Бұған дейін жексенбі күні Трамптың Украина жөніндегі арнайы өкілі Кит Келлог алдымен атысты тоқтатып, содан кейін келіссөз басталу керек екенін және "басқа жол жоқ" екенін жазған.

Жексенбі күні Ресей мен Түркия президенттері телефонмен сөйлескені туралы хабар тараған. TRT Haber мәліметі бойынша, Түркия президенті Режеп Тайып Ердоған Анкараның диалог үшін алаң ұсынуға әзір екенін растаған және "бейбітшілікке қол жеткізу үшін мүмкіндік терезесі ашық" деп мәлімдеген. Түркия президенті сондай-ақ "жан-жақты атысты тоқтату келіссөздер үшін жағдай жасайды" деп атап өткен. Сонымен қатар, келіссөздер алдында Ердоған Франция президенті Эммануэль Макронмен телефонмен сөйлескен. "Соғысты тоқтатуға қарай тарихи бетбұрыс сәті туды – оны пайдалану керек. Түркия атысты тоқтатып, тұрақты бейбітшілік орнату үшін келіссөз ұйымдастыруды қоса алғанда кез келген үлес қосуға дайын", – деген Ердоған.

Ресей сыртқы істер министрлігі Ердоғанның Путиннің бастамасын толық қолдағанын хабарлады, бірақ атысты тоқтату туралы министрлік мәлімдемесінде ештеңе айтылмаған.

Бішкектегі №33 мектеп-гимназияға қазақ жазушысы, Қазақстанның қазіргі президенті Қасым-Жомарт Тоқаевтың әкесі Кемел Тоқаевтың есімі берілді. Бұл жөнінде Қырғызстан президентінің баспасөз қызметі хабарлады.

Ресми ақпаратқа қарағанда, мектепке қазақ жазушысының есімін беру туралы бастаманы президент Садыр Жапаров көтерген.

№33 мектеп-гимназиясында соғыс жылдары жаяу әскер училищесі орналасқан және Кемел Тоқаев соны бітіріп, сол жақтан майданға аттанған деседі.

Бір ай бұрын Қазақстан президенті осы мектепке арнайы автобусты сыйға тартқан.

Кей сарапшылар Қасым-Жомарт Тоқаев президенттікке келгелі бері Қазақстанның өз ішінде оның әкесінің есімі жиі аталып, оны мақтау мен мадақтау жиілегенін айтады. Кейбірі Назарбаев кезеңіндегі жеке басқа табынушылық белгілері көріне бастағанын да айтқан.

Бұған дейін жергілікті шенеуніктер Кемел-Тоқаевтың суреті салынған ондаған кілем мен оның бейнесі бедерленген 200 медаль жасауға тендер жариялап, кейін қоғам сынынан кейін алынып тасталған еді. Тоқаевтың өзі жергілікті ақпарат құралдарына өзінің "мақтау-мадақтауды жараптайтынын", ондайға “табиғи иммунитеті” барын айтқан.

ОҚИ ОТЫРЫҢЫЗ

Тағы да жеке басқа табыну ма? Кемел Тоқаевты мадақтау неге жиілеп кетті?

Астана соты “сот шешімін орындамағаны үшін” (669-бап, 1-бөлігі) белсенді Ермек Нарымбайды бес күнге қамады. Бұл жөнінде сот қаулысына сүйенген ҚазТАГ жазды.

Сот қаулысында "әлеуметтік әділетсіздікті" қалпына келтіру және "заңды бұзған адамды тәрбиелеу" мақсатында, сонымен бірге оның "қайта заң бұзуына жол бермес үшін" белсендіні қамау туралы шешім шығарылғаны жазылған.

Әкімшілік хаттамаға қарағанда, биыл 20 наурыз бен 21 сәуір аралығында Ермек Нарымбай Facebook желісінде "әлеуметтік-саяси, экономикалық мәселе туралы он жазба жариялаған".

Бұған дейін адвокаты Василий Садықов бірнеше күн бұрын Ермек Нарымбайды полиция қызметкері "оның қолын қайырып, тіпті аяқ киім киюіне де мүмкіндік бермей, үйінен күштеп алып кеткенін", белсендінің денесі ауырғанын жазған еді. Полиция ол кезде түсініктеме бермеген.

2023 жылы қыркүйекте шыққан үкім бойынша Нарымбаевқа "қоғамдық-саяси және әлеуметтік-экономикалық мәселелермен айналысуына" тыйым салынған. Осы шешім негізінде белсендіге “сот шешімін орындамады” (669-бап 1-бөлік) деген айып тағылған.

Сот шешіміне қарағанда, Нарымбай процесс кезінде бұрын қылмыстық жауапкершілікке тартылған бап өзгеріске ұшырағанын, сол себепті сол бап негізінде шыққан сот қаулысының заңдық күші жоқ екенін айтып, іс материалдарын Конституциялық сотқа жіберу туралы өтініш білдірген. Бірақ сот оның өтінішін орындамаған.

Ермек Нарымбай дәл осындай баппен наурыз айында да бес күн қамауда отырып шыққан еді.

Байқоңыр айлағынан ұшырылған Шолпанға жіберілген советтік «Космос-482» аппараты 53 жылдан кейін – 10 мамырда таңертең Үнді мұхитына құлады деп хабарлады Роскосмос. Зонд Шолпанға баруы тиіс болған, бірақ аппараттағы ақауға байланысты тиісті траекторияға түсе алмай, жылдар бойы Жерге жақын эллипстік орбитада тұралап қалған.

"Космос-482" 1972 жылы 31 наурызда "Молния-М" ракета тасығышының көмегімен ұшырылды. Ол соған дейін бірнеше күн бұрын ұшырылған "Венера-8" станциясының көшірмесі болуы тиіс еді.

Ғарыш станциясының үдеткіші іске қосылмай, ол жылдар бойы эллипстік орбитада қалып, біртіндеп Жерге жылжи берген. Сол жылы маусымда ұшуды басқару орталығының операторлары үдеткіш пен ұшу модулін аппаратпен бөлу туралы шешім қабылдаған. Олар орбитадан 1981 жылы кетті.

• Станцияны ұшырған зымыран тасығыштың үшінші сатысының бөлшектері 1972 жыл сәуірде Жаңа Зеландияның Эшбертон қаласы маңына құлады. Әрқайсысының салмағы 13,6 келі болатын төрт титан шары сол кезде бірден, бесіншісі 6 жылдан кейін табылды. Шарлардың бірі табылғаннан кейін полиция бөлімшесіне жеткізіліп, бекітілген. Оған не істеу керектігін ешкім білген жоқ, деп жазды New Zealand Herald. Совет билігі өзінің шарларға қатысын жоққа шығарды.
• "Венера-8" Шолпан жұлдызына 1972 жылы шілдеде жетті. Аппарат планетаға қонып, сондағы желдің жылдамдығын өлшеп, топырағын зерттеген. Станция қонғаннан кейін 50 минут 11 секунд жұмыс істеген.

Ресей президенті Владимир Путин Украинаға еш шартсыз 15 мамырдан бастап Стамбулда тіке келіссөзді жалғастыруды ұсынды. Ол Украина ұсынған атысты 30 күнге тоқтату туралы ұсыныс жөнінде мүлде айтпады.

Путин 11 мамырда түнде баспасөз жиынын өткізді.

Журналистер алдына шыққан Путин барлығын "жеңіс мерекесімен" құттықтады. Ол Ресей мен Қытай арасындағы қарым-қатынақа тоқталып, екі жақтың әріптестігін "шынайы конструктивті" деп атады.

Ол мұны Ресеймен "арсыз" қарым-қатынас жасап, ультиматум қойған мемлекеттерге қарсы қойды.

Путиннің айтуынша, ол Мәскеуге келген мемлекет басшыларымен келіссөз кезінде "Украинадағы соғысты реттеу" мәселесін де талқылаған. Ол Киевті энергетика нысандарына соққы жасады және бұған қоса, Мәскеудің біржақты түрде жариялаған атысты үш күнге тоқтату туралы режимін бұзды деп айыптады.

"Атысты тоқтату режимі жарияланған үш күнде Курск облысына мақсатты түрде бес шабуыл жасалды және Белгород облысы, өзге аудандарға 36 шабуыл талпынысы болды" деді Путин. Ол Украинаны Мәскеуге барған шет мемлекеттердің басшыларын қорқытуға тырысты деп айыптады.

Ресей президентінің айтуынша, атысты тоқтату туралы келесі келіссөзді Стамбұлда өткізген дұрыс. Ол 2022 жылы сол жақта бейбітшілік туралы келіссөз басталып, үзілгенін еске салды.

10 мамырда Киевте Украина президенті Владимир Зеленский Франция басшысы Эммануэль Макрон, Германия канцлері Фридрих Мерц, Польша премьері Дональд Туск және Ұлыбритания премьер-министрі Кир Стармермен кездескен.

Кездесуден кейін Зеленский 12 мамырдан бастап атысты 30 күнге тоқтату қажеттігі туралы ортақ мәлімдемені жариялады.

Мәлімдемеде тараптар атысты тоқтату үшін ешқандай шарт қоймау қажеттігіне келіскені жазыған.

"Егер Ресей осындай шарттарды алға тартса, онда мұны оның соғысты жалғастыру және дипломатияны үзу талпынысы ретінде қарастыру қажет" деп жазылған мәлімдемеде.

Мәскеу одан бас тартса, "Ресейдің отыны, мұнай мен кеме флотына бағытталған банк пен энергетика секторына" санкцияны үдету керектігі жазылған.

Жексенбі күні Путиннің Стамбұлдағы келіссөзді жалғастыру туралы ұсынысына реакция білдірген Киев "Мәскеу әуелі атысты тоқтатсын" деген талап қойды.

"Әуелі 30 күнге атысты тоқтатсын, одан кейін қалғаны. Ресей соғысты жалғастырғысы келетінін сөзбен жасырмауы керек. Атысты тоқтату - соғысты бітірудің алғашқы қадамы және ол Ресейдің адам өлтіруді тоқтатуға дайын екендігін дәлелдейді" деді Украина президенті кеңсесінің жетекшісі Андрей Ермак желіде.

Оның алдында осыған ұқсас пікірді Украина басшысы Владимир Зеленский де айтқан. Еуропа жетекшілері де Киевтің ұсынысын қолдап, Ресейді қантөгісті тезірек тоқтатуға үндеді.

АҚШ президенті Дональд Трамп Вашингтонның араағайындығының нәтижесінде Үндістан мен Пәкістан арасында атыс тоқтағанын мәлімдеді.

"АҚШ-тың араағайындығымен түні бойы созылған келіссөздерден кейін Үндістан мен Пәкістан атысты дереу әрі толық тоқтатуға келіскенін қуана хабарлаймын" деп жазды Трамп Truth Social желісінде.

Атыс тоқтағаны жөнінде ақпаратты Пәкістанның вице-премьері Исхак Дар да растады.

Үндістан мен Пәкістан арасында жағдай 22 сәуірде Үндістанның бақылауындағы Кашмирде үнді туристеріне жасалған қарулы шабуылдан кейін күрт шыққан. Шабуылды исламистік сепаратистік топ мойнына алды. Қанды оқиғадан 26 адам қаза болды. Шабуылдаушылардың үшеуі Пәкістан азаматы екені айтылады.

6 мамырда Үндістан Пәкістанға қарсы әскери операция бастады. Делидің хабарлауынша, үнді әскері "теракт үшін пайдаланылған инфрақұрылымға соққы жасауды" көздеген. Пәкістан оған жауап ретінде әуе кеңістігін жауып, ракетамен соққы жасаған.

10 мамырда Пәкістан Үндістанға қарсы "Берік қабырға" атты ауқымды ірі әскери операция бастағанын хабарлады. Исламабад әскери қимылды елдің "егемендігі" мен оның "езілген азаматтарын" қорғау қажеттігімен түсіндірді.

Ақпарат құралдарының жазуынша, пәкістандық армия бірнеше үндістандық әскери нысанға шабуылдаған. Дели пәкістандық әскерді бейбіт аудандарға соққы жасады деп айыптады.

10 мамырда Киевте Украинаға әскери көмекті жалғастыруға ниет еткен елдердің басшыларының келіссөзі өтеді

Украина ақпарат құралдары 10 мамырда таңертең Киевке Франция президенті Эмануэль Макрон, Ұлыбритания премьері Кир Стармер, Германия канцлері Фридрих Мерц және Польша премьері Дональд Тусктің пойызбен жеткенін хабарлады.

Украина сыртқы істер министрі Андрей Сибиганың сөзінше, “Украинаны қолдауға бағытталған маңызды шешімдер” қабылданады. Өзге жайттармен қатар атысты тоқтату шарттары мәселесі де талқыланады.

Ресей 8-10 мамыр аралығында Жеңіс күніне орай атысты үш күнге тоқтатынын мәлімдеген. Алайда екі жақ қарсы тараптың әскери қимылды жалғастырғанын айтты.